في المقالة دي هنحاول نغطي المراحل الي هيمر بيها اي حد هيقدم جديد علي الجيش في تجنيد اسيوط علشان تتضح له الرؤية اكتر ويبقي عارف هيمشي وهيتحرك ازاي جوا مكتب تجنيد وتعبئة اسيوط
وفي المقالة الي فاتت ذكرنا كل طرق الوصول لتجنيد اسيوط لو انت من سوهاج او الوادي الجديد وجاي عن طريق عربية او قطروشوية نصايح كمان(اضغط هنا لقراءة المقال) ،المقالة غطت حجات كتير
 |
| مكتب تجنيد اسيوط - الخطوات والمراحل ويوم الكشف الطبي في تجنيد اسيوط |
ملحوظة هام: هذة الخطوات لغرض تعليمي وبشكل عام ولا تغني ولا تكون بديل عن اي تغيير او خطوات اضافية تابعه للتجنيد (يعني ممكن تضاف قرارات او خطوات جديدة مش مذكورة فالمقالة لكن بصفة عامة دي الحاجات الاساسية والي واجهتنا بشكل شخصي وطبعا انتوا فاهمين وعارفين ان ممكن يضاف جديد زي ماحصل مع الدفع الي بعدي بخصوص تلقي لقاح كورونا او اثبات تلقية، دا المقصد )
ارقام تجنيد أسيوط
ناس كتير سألونا علي الصفحة عن رقم تليفون منطقة تجنيد أسيوط علشان نسهل عليكم جبنالكم ادي ارقام التجنيد بتاع اسيوط لو عندك اي استفسار او حابب تتواصل معاهم
مرحلة تجهيز الاوراق
طيب في الاول خالص خلينا نبدأ باول مرحلة خالص وهي مرحلة المركز الخاص بيك،انت هتروح المركز او قسم الشرطة التابع ليه هتلقي في مكتب تجنيد هناك هتقولة تاريخ ميلادك وبطاقتك وهيقولك المعاد الي تجيب فيه الورق بتاعك
طيب اية الاوراق المطلوبة
- بطاقة رقم قومي (تحقيق شخصية) لازم تكون سارية
- البطاقة العسكرية الـ 6 جند (بتجيبها من مكتب التجنيد فالمركز) او بديلها 7 جند حسب ما يديلك العسكري المسؤل هناك هوا اعلم بشغله
- شهادة ميلاد حديثة (تكون فيها رقم ثلاثي ) مكتوب من تحت
- ورقة فيش وتشبية (صحيفة جنائية) جديدة ميكونش مر عليها 3 اشهر (بتجيبها من القسم التابع ليك بتاخد يوم)
- تحديد فصيلة الدم (من مستشفي حكومي قولهم للتجنيد )
- شهادة المؤهل الدراسي
- فيش بصمات 1جند (للعاديين - بدون مؤهلات يعني) بمعرفة مندوب التجنيد بالمركز بتاعك (تحقق من المعلومة من مركزك)
جهزت الاوراق وكله تمام ،هتروح بيه علي القسم فمكتب التجنيد بتاع مركزك هياخد ورقك وهيدبسة وهيديك معاد الكشف الطبي والعرض في مكتب تجنيد اسيوط او ممكن يقولك روح وتعالا المركز هنا بعد كام يوم علي حسب بقي
ملحوظة: العسكري بيختم لك ميعاد الحضور والكشف الطبي علي ورقة زيادة فوق ورقك تقريبا " 20 جند " دي الي بيها بتقدر تتوجه للتجنيد هنا فاسيوط
خلصت كدا ورحتله استلمت ورقك وجهزت دنيتك كدا المرحلة بتاعتك الجاية انك تروح منطقة تجنيد وتعبئة اسيوط
مراحل تجنيد اسيوط خطوة بخطوة
ودي بيكون فيها يوم الكشف الطبي ،حضرتك هتيجي ولو ركبت تاكس قوله نزلني عند البوابة بتاعة الكشف الطبي علشان في كذا بوابة في منطقة التجنيد
كام نصيحه قبل ما تيجي :
- صور ورقك كله 5 صور احتياطي (هوا انت بتصور بزيادة بس علشان تكسب وقت) في مكتبة برا التجنيد متقلقش
- احلق ...احلق ...احلق فوق وتحت
- البس لبس خفيف (سهل الازالة ) علشان هت*قلع فالتجنيد وقت العرض الطبي وكمان يفضل شبشب (خد براحك كانك فالبيت)
- الشنط والاكياس ممنوعه من دخول منطقة التجنيد لكن الموبايلات عادي
- لم ورقك كله ف ملف كبسولة البلاستك دا هترتاح
- اشتري قلم جاف برا (لون ازرق فقط) من المكتبة ومتديهوش لحد هتحتاجة
- متاخدش بكلام اي حد برا التجنيد غير لما تتاكد (حصل موقف قدامي ان واحد فاتح عند التجنيد حب يطلع بسبوبة من الناس الي جايبة ملف كبسوله ملون مرسوم عليها ميكي وكدا قالهم مش هينفع الملون لازم ملف شفاف) جوا مش بياخدوا ملفات الكبسولة اصلا مش بياخد غير الورق ففكك من حواراتهم وبنعتذر لك نيابه عنهم
- ركز فالكلام الي هيتقال كويس علشان ممكن توصلك معلومة كدا ولا كدا
- استحمل العساكر هما قرفانين كل يوم فالحوار دا فمتاخدش اي كلام علي صدرك واي غلط من عسكري اطلع علي مكتب الشكاوي علي طول وقول شكوتك بس تاكد ان في حد هيقف معاك علشان شكلك قدامهم هيبقي وحش
- هات فلوس معاك احتياطي لان ممكن اليوم يطول فتشتري وتاكل جوا لان مفيش خروج برا البوابة
- البطاقة بتاعتك متكونش مكسورة لازم سليمة وساريه علشان ميتلككوش لك وتخبط يوم عالفاضي لانك مش هتدخل لو مكسورة
1.مرحلة دخول البوابة
اول ما هتدخل البوابة هتلقي علي شمالك مكتب الامانات طلع موبايلاتك وصورة البطاقة بتاعتك واديها للعسكري ومتتحركش غير لما تاخد كود الصندوق الي فيه موبايلك (حافظ عليها اوعي يقع منك ) وانت وخارج ابقي اديهولة وقوله اسمك ثلاثي
بعدها هتعدي علي مجند التفتيش،هيفتشك فوق وتحت بعد كدا هتقف طبور لشراء ودفع "البون " ايصال وكتاب شاب التجنيد
وقفت فالطبور هتدفع 12.5 جنية تقريبا تمن بون وكتيب شاب التجنيد جهز صورة شهادة الميلاد والفلوس الفكة لو معاك
ملحوظات عند بون شاب التجنيد:
- حاول تجيب فلوس فكة معاك لان ممكن تحتاج تدفع بيها بون شاب التجنيد
- ظبط مع الي قدامك او وراك بحيث ممكن تدفعوا انتوا الاتنين مع بعض (لو عسكري الشباك قال كدا زي ماعمل معاانا)
- جهز صورة شهادة الميلاد فايدك لان بيها بيتم اتمام انك دفعت بمعلوماتك
- حافظ علي الكتيب وايصالات السداد وحطهم ف الملف الكبسولة زي ماقولتلك علشان لو في اي حاجة يبقوا معاك
- تاكد ان اسمك صح وبياناتك صح
سددت وظبطت دنيتك وكله تمام هتدخل بعد كدا علي مرحلة الي بعدها
2.مرحلة ترتيب الاوراق والتلقينات
هتدخل كدا في الصالة مليانة مساطب عليها علامات حمرا ،هيجي حد يشرح لكم ترتيب الاوراق والنظام الي هتمشوا بيه جوا والخطوات وهيقولوا لكم التلقينات(الامني - الطبي - المدني)،والتلقينات دي بتكون الحالات الممنوعه من دخول الجيش زي المشكلات الطبيه والمشكلات الامنية وهكذا
3.مرحلة قياس الطول والحجم والتصوير
ملحوظة هامة : البطاقة الاصل تكون فايدك وانت داخل
خلصتوا التلقينات وترتيب الاوراق وسلمتوها فالصاله هتدخل علي مرحلة التصوير او الوزن والطول (مش متذكر اي خطوة الاول) بس مش مشكلة يعني
هتروح تلبس الافارول عاللحم (هتزرر اول زر بس) وتدخل علي اوضة الوزن والطول وهتقف علي عمود الكتروني هيوزنك وهيجيب طولك وهيقولك اطلع علي اوضة التصوير هياخد صورة ليك عالكرسي وهتبصم فالجهاز الالكتروني بايدك اليمين مرة والشمال مرة
والعسكري هيقولك اقعد عالكرسي وبص عالكاميرا هتبص وهياخد لقطة وهيقولك اخرج،هتطلع وتغير الافارول وتمسك هدومك فايدك علشان هتدخل الكشف الطبي الاولي (المبدئي)
4.مرحلة الكشف الطبي
هتمر في المرحلة دي بكشفين بالاضافة لأخذ عينه من الدم
- الكشف الطبي المبدئي (الاولي)
- اخذ عينة الدم
- الكشف الطبي في العيادات
خطوة الكشف الطبي الاولي
في المرحلة دي هتدخل تقلع كل حاجة انت لابسها ماعدا الشورت وهيجي طبيب مجند يديكم ورقة فيها جزء فوق اسمها الشكاوي وجنبها نقط هتكتب كل حاجة بتشتكي منها ،خلي بالك دا كشف ظاهري يعني الي هيشوفة الدكتور هيكتبه في مشكلات داخلية عندك بتكتبها لانه مش هيشوفها اكيد،ولو مكتبتش هتلبس اكيد ،المهم هيخليك تلف كدا وتقف علي طراطيف صوابع رجلك ،واخر حاجة هيقولك افتح الشرط بايدك "علشان يشوف حمادة " ولو في مشكلة لا قدر الله هيدخلك اوضه بستارة ويقولك اقلع متقلقش
طبعا بعد ما بتكتب كل حاجة ويخلص الفحص الاولي بتبصموا عالورقة وبيجي الدكتور يختم كل الورق وبتدخل علي المرحلة الي بعدها
خطوة اخذ العينه
في المرحلة دي المفروض بياخدوا منك عينه دم اعتقد للتحقق من وجود فيرس سي ولا لا (ربنا مايسوء حد)،بس كل القصة انك بتدخل بالورقة بتاعة الكشف الاولي ويديك سرنجه وقطنه وبتدخل علي دكتور بياخد عينه صغيرة منك وبنفس الترتيب بيكتب حاجة فالورقة كدا
خطوة الكشف الطبي في العيادات
المفروض في الكشف الطبي الاولي بيعلم لك قبال كل عيادة بالمشكلات الي انت بتقولها والمشكلات الي هوا هيشوفها ،لو نظر هيعلم رمد ويكتب المشكلة ولو انيميا يبقي باطنة ولو كسور يبقي عظام وهكذا
بتشوف العيادات الي متعلم لك عليها وبتشوف اذا كانت العيادة موجودة فاليوم دا هتدخل تكشف عادي ولو مش يومها هيقولك روح وتعالا اليوم كذا
5.المرحلة الاخيرة
في المرحلة دي المفروض بيتم عرضكم علي مدير المنطقة ويختار مجموعة تروح الحلمية 10% وكمان ممكن يعرضوكم علي شاشة الكونفرينس اونلاين علي النت بالجنه العليا من هناك
الي اخد اعفاء من هنا
بيطلع برة يبصم كذا بصمة علي كذا ورقة وتمام بياخد غير لائق وبيحددوا له معاد يجي يستلم فيه الشهادة
الي اخد لائق
بياخد ورقة ال 110 وبيجي يوم الارجاء ويشوف لو هو ظابط او نزل عسكري وبيعرف يوم التوزيع علشان يجية وهكذا
الي اخد لجنة عليا
- لو مرشح ظابط احتياطي ولجنه عليا: هتستني يوم الارجاء وهتشوف لو نزلت جندي ولا لا
- لو جندي ولجنه عليا : هتروح علشان تعرف معاد سمعان السلاح بتاع مركزك
- لجنة عليا وكنت ظابط ونزلت جندي : هتروح منطقة تجنيد اسيوط تاني هيختمولك بجندي + يدوك معاد علشان تسافر الحلمية اللجنه العلية (هتاخد الكود - وال 110 وورقك الباقي الي عاملة فالملف بعيد عن ورق التجنيد)
في مستجدات حصلت مع صحابي حبيت انبهكم ليها ،ان اللقاح بتاع كورونا بقي اجباري دلوقت وهتاخدة فالتجنيد بس مش عارف فانهي مرحلة فاي حد بيشتكي من حاجة معينه يتكلم ويقولهم لحسن تحصل مشكلات + الي واخده قبل كدا برضوا يبلغهم ويجيب شهاده تلقي القاح معاه
بس كد دا كل الي هتواجه هناك ودا الي حصل معايا شخصيا علشان كدا بشرح لكم كل حاجة واتمني من الله اني اكون افدتكم ولو بمعلومة صغيرة
لو حابب تضيف اي معلومة جديدة اكتبها في التعليقات وساعد غيرك بيها واحنا ممكن نرفقها بالمقالة
الموقع غير مسئول عن محتوى التعليقات و نرجو الإلتزام باللياقة في التعبير